البديل الأفضل لبرفان تريه دى ايرماس أو دى تواليت Terre d'Hermas for man

البديل الأفضل لبرفان تريه دى ايرماس أو دى تواليت Terre d'Hermas for man

مساء الخير على كل محبين العطور فى مصر والوطن العربي النهارده معانا عطر شتوى كلاسيك مشهور جدا بره مصر بس للاسف ملهوش محبين كتير فى مصر مع العلم أنه من افضل اصدارات العطور فى اخر عشرين سنه وهو تريه دى ايرماس فور مان

Terre d'Hermas for man

طبعا زى مهو معروف العطر مشهور بالوسط الراقى لانه عطر بيجى من بيت ازياء فرنسى راقى وكلاسيكى بيجى فى مقدمه العطر الحمضيات خصوصا البرتقال وفالوسط بتيجى التوابل خصوصا الفلفل الاسود القاعده فيها فتيفر وباتشولى و خشب الصندل طبعا الخط العطرى مش معقد ولكنه بسيط و راقى جدا والعطر ده بنصح فيه أو للفئه العمريه من اول 30 أو 35 لما فوق مش حيبقى مناسب السن الاصغر من كده ولكن طبعا دى رأى ممكن حد يجريه ويعجبه ويقتنيه كمان العطر فالاستعمال النهارى فكل الفصول رائع جدا بالذات لو لابس زى رسمى أو كلاسيكى حيبقى ممتاز جدا

أداء العطر الاصلى ممتاز جدا سواء الثبات أو الفوحان وشكل زجاجه العطر جميل وكلاسيكى

بوجه عام هو عطر رائع وممتاز جدا ولكن طبعا عيبه الوحيد سعره اللى ممكن يعدى 2500 جنيه وهو سعر مبالغ فيه مع أنه عطر جميل جدا وراقى جدا ومعانا النهارده عطر مشابه ليه حيديك نفس الاحساس وهو

Yves de sistelle Ivanhoe

عطر ايفانهو من بيت عطور فرنسى وهو إيف دى سيستيل وهو عطر رائع جدا بالذات لو قارنه بسعره وهو متوسط سعر فى محلات العطور فى مصر أو على مواقع التسوق الالكتروني هو 160 جنيه ممكن يوصل لغايه 350 فى بعض المواقع ولكنه عطر ممتاز جدا حيديك نفس احساس العطر الاصلى ولكنه لا يقارن بجوده الخامات أو العناصر المستخدمه فى العطر الاصلى طبعا لان السعر هنا بيتحكم فى المواد الخام المستخدمه ولكنه عطر ممتاز خصوصا مع العرض والتقديم الجميل للعطر من عليه كرتون لا بأس بها وزجاجه ممتازه وشكلها جميل والغطاء محفور عليه شعار بيت العطور بشكل تخليه مش باين عليه أنه عطر رخيص أو اقتصادى

مقدمه العطر فيها حمضيات وخصوصا الجريب فروت وكمان فيها فلفل وردى القلب فيه توابل واخشاب والقاعدة فيها فيتفر وباتشولى ومسك ابيض رائحه العطر مقاربه إلى حد كبير لعطر تريه دى ايرماس واداءه كمان كويس جدا ولكنه زى العطر الاصلى برضه مناسب اكتر الفئه العمريه الأكبر شويه

 بالنسبه لأداء العطر فهو متوسط ممكن يكون جيد كمان يعنى حيديك ثبات 6 إلى 7 ساعات وفوحان لمده ساعه الى ساعه ونصف ولكنه أداء جيد جداً بالمقارنة بسعر العطر 

بالنسبه للتقييم هذا العطر فانا حديله للعرض والتقديم 10/8.5 والرائحه 10/8 والثبات والفوحان 10/7.5 والسعر مقابل القيمه 10/9 التقييم العام للعطر هو 10/8 وحيظل بديل ممتاز جدا العطر الاصلى