البديل الأفضل لبرفان توم فورد بلاك اوركيد Tom ford black orchid

البديل الأفضل لبرفان توم فورد بلاك اوركيد 

Tom ford black orchid

مساء الخير على كل محبين العطور فى مصر والوطن العربي النهارده حيكون معانا عطر شتوى مشهور جدا فى مصر وليه شعبيه كبيره عند كتير من الشباب وهو توم فورد بلاك اوركيد العطر طبعا ممتاز من كافه النواحى ولكن يعيبه فقط كثره مستخدميه من الجنسين لأن العطر اصلا هو عطر نسائي ولكن يمكن للرجال استخدامه وكمان يعيبه طبعا سعره المبالغ فيه اللى ممكن يتجاوز 2000 جنيه مصرى وانا النهارده حستعرض العطر الاصلى والبديل الممتاز اللى معانا النهارده

Tom ford black orchid توم فورد بلاك اوركيد

العطر بيجى فى علبه وزجاجه قيمه جدا وطبعا ده حال كل العطور من بيت عطور توم فورد افتتاحية العطر جميله جدا وبيجى فيها حمضيات وفواكه افتتاحية مبهجه جدا والقلب فيه زهور وتوابل وده اللى بيخلى العطر نسائى زى منوهت فالاول والقاعدة فيها شيكولاته وفانيلا وبتشولى وعنبر ومسك وخشب الصندل وفيتفر طبعا اللى جرب العطر اكيد اخد باله من أن النوته اللى مهيمنه على العطر هى الشكولاته والفانيلا وكمان الباتشولى والفواكه المجففة

أداء العطر طبعا ممتاز جدا سواء الفوحان او الثبات وطبعا ده بسبب المكونات الغاليه المستخدمه فى العطر ده شرح بسيط العطر الأساسى اللى معانا النهارده وحستعرض معاكم العطر البديل الممتاز العطر ده وهو

Ard alzaafaran oud 24 hours عود 24 ساعه من ارض الزعفران

العطر اسمه عود 24 ساعه من بيت عطور امارتى مشهور وهو ارض الزعفران متوسط سعر العطر ده فى محلات بيع العطور فى مصر حوالى 200 جنيه والعطر بيجى فى علبه وزجاجه شرقيه ممتازه جدا وفيها اهتمام بالتفاصيل سواء الغطاء أو العلبه الكرتون وبيجى كمان مع زجاجه العطر مزيل عرق كل ده ب200 جنيه فهل العطر ده يستاهل المبلغ ده 

بدون أدنى شك طبعا العطر ممتاز وانا هنا بتكلم على العطر نفسه بيجى فالافتتاحيه حمضيات وشوكولاته والقلب فيه زهور وتوابل وده مش حتحس بيه اوى مش زى العطر الاصلى والقاعدة فيها عنبر وخشب الصندل والباتشولى ولمحه بسيطه تكاد لا تذكر من العود العطر زى العطر الاصلى النوته المهيمنة هى الشكولاته والعنبر والباتشولى ومفهوش توابل زى العطر الاصلى وده الفرق الوحيد ولكن رائحه العطر متطابقه مع بلاك اوركيد وده بسبب الشكولاته المهيمنة فى العطرين

أداء العطر ممتاز كمان مشابه للعطر الاصلى فى الثبات او اقل بفارق مش كبير والفوحان كمان كويس جدا هو أقل من بلاك اوركيد ولكن انا شايف أن دى ميزه مش عيب لأن العطر الاصلى كان مستهدف النساء كمستخدمين ليه فوحان قوى جدا وممكن يزعج الناس لو كترت منه

العطر زى مقولت رجولى أكثر وده بسبب لمحه العود البسيطه إلى جانب أن الزهور مش واضحه اوى زى بلاك اوركيد وكمان بسبب أن فوحانه مش قوى زى بلاك اوركيد 

حتكلم بس قبل التقييم العام عن زجاجه العطر الجميله جدا واللى بتيجى بكتابه باللغة العربية عليها ونقش عربى باللون الذهبى بتديها شياكه وتخليها تزين المجموعه العطريه التى تمتلكها

التقييم العام للعطر بالنسبه لرائحه العطر 10/8,5 العرض والتقديم 10/9 الاداء الاول الثبات 10/9 والفوحان 10/8 والقيمه مقابل السعر 10/9,5 التقييم النهائي العطر هو 10/9