Rasasi daarej عطر الخريف والشتاء المثالى رصاصى دارج

Rasasi daarej عطر الخريف والشتاء المثالى رصاصى دارج 

مساء الخير على كل محبين العطور فى مصر والوطن العربي

موضوع النهارده حيكون مختلف شويه عن المواضيع التي بتناولها بالفتره الاخيره وحيكون عن عطر ممتاز جدا من بيت عطور رصاصى طبعا من افضل بيوت العطور الاماراتيه والعطر طبعا مشهور جدا وهو دارج

الاختلاف فموضوع النهارده انى حتكلم على عطر بعينه بغض النظر عن أنه شبيه أو بديل لأى عطر تانى موجود في السوق مع العلم أن عطر دارج هو شبيه لعطر قديم أتوقف إنتاجه وهو فالنتينو فى وطبعا العطر مش متوفر من فتره كبيره وده اللى بيدى لعطر دارج التفرد والتميز عن أى عطر تانى موجود فى السوق

طبعا أنا اتناولت عطر دارج قبل كده فأفضل عطور الرصاصى وكان فى المركز الثالث بس بعد استخدام العطر لاكثر من سنه استحق أنه يكون افضل عطر عندى من الرصاصى والعطر الوحيد اللى عندى ليه زجاجه احتياطيه لانى استعملت اكثر من نصف الزجاجه الحاليه

متوسط سعر العطر فى محلات بيع العطور حوالى 350 جنيه وده سعر مناسب جدا بعد مكان وصل سعره لاكثر من 450 جنيه

العطر يصنف كعطر توابل حار شرقى الافتتاحيه للعطر فيها حبهان وكمون والقلب فيه ايريس وورد والقاعدة فيها فانيلا وبتشولى و مسك وعنبر وخشب الصندل وتونكا تكوين العطر  وتغيره على الجلد ممتاز الأداء والثبات ممتازين اكتر من 10 ساعات ثبات وفوحان ل3 ساعات ( نسخه عام 2017 ) وده يخليه مثالى للخروج لفصل الشتاء والخريف

الغريب فى العطر ده أنه مناسب لجميع الاعمار وحتلاقى مجاملات واطراء عليه من جميع الأعمار يعنى ممكن شاب يشوفه عطر شبابى ممتاز ينفع للسهر والخروجات وغير مناسب للاستخدام النهارى لو كنت موظف حتلاقيه ينفع جدا للمكتب أو العمل الصباحى وغير مناسب للسهرات والمناسبات الخاصة لو كنت عديت 50 سنه حتى حتحس أنه مناسب جدا لعمرك وغير مناسب للشباب ودى حاجه قليل جدا لمه بنشوفها فى عطر بالسعر ده

حتى شكل زجاجه العطر جميل جدا ولون العطر نفسه فريد من نوعه لو بس رصاصى غيرت الغطاء الخاص بالعطر واستبدلته بغطاء شبه اللى فى عطورها زى هوس أو تصميم وبس صرفت شويه على شكل العلبه الكرتون ممكن العطر ده يتباع باكثر من ضعفين ثمنه الحالى ويدخل فى قوائم افضل عطور الخريف والشتاء لافضل مراجعين العطور العالمين 

العطر بالنسبه ليه هو افضل عطر خريفى شتوى عندى وبفضله حتى عن لانوى دى لوم اللى فيه حبهان زى دارج وطبعا لأن أداء دارج افضل وممكن فالافتتاحيه تحس أنه فيهم من بعض شويه ولكنهم مختلفين تماما وكمان ممكن فى القلب تحس الاحساس البودرى زى ديور اوم انتينس مثلا ولكنه مختلف تماما عن ديور اوم انتينس وده بيرجع للايريس المستخدمه فى الاتنين القاعده جميله جدا طبعا  الفانيلا والتونكا بتضيف حلاوه العطر مع المسك والعنبر وخشب الصندل اللى بيحافظ على طول بقاء العطر على الجلد

العطر كتقييم  رائحه 10/10 والأداء والفوحان 9.5/10 والاستعمال فى كل الاوقات 8.5/10 لانه صعب تستخدمه فالنهار فى فصل الصيف غير كده هو بيعمل فاى وقت آخر 

العرض 8/10 والقيمه مقابل السعر 10/10 وكتقييم إجمالى 9.5/10